Boşanmadan öncə bunları bilmək MÜTLƏQDİR – Əmlaklar və pullar...

Bu gün məhkəmələrdə araşdırılan işlərin böyük qismi məhz boşanma zamanı yaranan əmlak mübahisələri ilə əlaqədardır. Bu mövzu ilə əlaqədar cəmiyyətin müxtəlif təbəqələrində aparılan müzakirələrdə boşanmadan sonra daha çox qadınların mülkiyyət hüquqlarının pozulduğu iddia olunur. Bəs qanunvericilik boşanma zamanı və yaxud boşanmadan sonra yaranmış əmlak mübahisələrinin həllini necə tənzimləyir? Mövzu ilə bağlı hüquqşünas Ramil Süleymanov Referans.az-a danışıb.

“Ər və arvadın birgə mülkiyyəti dedikdə, nigah pozulana qədər əldə etdikləri əmlaklar nəzərdə tutulur. Bura daşınar və daşınmaz əmlaklar aiddir. Əgər ər və arvad nigaha girməzdən öncə və ya nigah dövründə nigah müqaviləsi bağlamış olarlarsa, həmin müqavilədə onların əmlakları ilə bağlı rejim müəyyən edilibsə, müqavilədəki müddəalar əsas götürülməklə onlar tətbiq olunur və orada qeyd olunan əmlaklar evli olan şəxslərin adına necə razılaşılıbsa o qaydada rəsmiləşdirilir. Birgə nigah dövründə və ya nigahdan öncə ərə və ya arvadın hər hansısa birinə bağışlama yolu ilə, o cümlədən, vərəsəlik qaydasında keçən əmlaklar nigah pozulduqdan sonra bölünmənin predimeti ola bilməz. Ər və arvadın əldə etdikləri əmlak onların ümumi birgə əmlakı hesab olunur. Bura işlədiyi dövr ərzində əldə olunmuş sahibkarlıq və intellektual fəaliyyət nəticəsində rəsm əsəri çəkməsi, musiqi bəstələməsi və ya roman yazması müqabilində əldə olunmuş gəliri, pensiyası, müavinəti, əldə olunmasından asılı olmayaraq əmanətlər, kapitalda olan paylar aiddir. Bunlar ümumi birgə mülkiyyət hesab olunur. Qeyd edim ki, ər və arvadın birgə nigah dövründə əldə etdikləri borclar onların payına görə qaytarılması müəyyən oluna bilər. Məsələn, ər və arvad evli olduğu zaman bankdan 2000 manat kredit götürübsə, nigah pozulduqda onlar həmin borcun yerdə qalan hissəsini bərabər hissələrə bölünməklə məhkəmə qərarında müəyyən olunmuş paylara uyğun geri qaytarılmasını tətbiq edə bilərlər”.

Nazim Hacıyev