Ağrıkəsicilərin insan orqanizminə MƏNFİ TƏSİRLƏRİ – Professor açıqladı

İnsanların əksər hissəsi müəyyən ağrılar və xəstəliklər zamanı ağrıkəsici dərmanlardan tez-tez istifadə edir. Belə dərmanlar ağrıların qarşısını almaqla birlikdə bəzən insan orqanizmində müxtəlif fəsadlara və ağrılara da səbəb olur. Bu hallar daha çox orqanizmdə olan başqa xəstəliklərin üzə çıxması ilə nəticələnir. Mövzu ilə bağlı daha ətraflı həkim-professor Adil Qeybulla Referans.az-a danışıb.

“Əvvəla qeyd edim ki, tibbdə geniş formada istifadə edilən ağrıkəsicilərin bir qrupu qeyri-steroid ağrıkəsicilərdir. Bunların iltihab əleyhinə qızdırmasalıcı təsirləri var. Bu dərmanlar uzun müddət istifadə edildikdə bir-sıra xəstələrdə ulsirogen, yəni mədə-bağırsaq sistemində qanama törədə bilər. Belə dərmanlar həm də qanda duruluğu artırır. Yəni bunların xüsusi əks-göstəriciləri yoxdur. Tibbdə geniş istifadə olunur və asılılıq yaratmır. Lakin müəyyən qruplar dərmanlar var ki, onların tərkibində opium var. Bunlara narkotik-analgetiklər, tramadol kimi dərmanlar aiddir. Sözügedən dərmanlar müəyyən müddət istifadədən sonra asılılıq yarada bilər və bu cür dərmanlar xüsusi qeydiyyatdadır və onlar həkim nəzarəti altında qeyd olunaraq xəstəyə təyin edilir. Narkoz zamanı mərkəzi analgeziyanı yaratmaq üçün narkotik-analgetiklərdən istifadə edilir. Tibbdə istifadə olunan ağrıkəsici maddələr əsas bunlardır. Bunlarla yanaşı bu qəbildən olan dərmanlar getdikcə təkminləşir və yeniləri ortaya çıxır. Amma iltihab əleyhinə maddələrə isə xüsusi asılılıq yaranmır, bunların sadəcə yan təsirləri nadir hallarda təsadüf edilir”.

Nazim Hacıyev